Alumnado dos últimos cursos da primaria do CEIP Heroínas de Sálvora participou neste 4 de abril nos obradoiros de marisqueo dirixidos a centros educativos que impulsa a Concellaría do Turismo da Pobra do Caramiñal, da cal é titular a edil Charo Varela (Nós Pobra), en colaboración coa Asociación Mar da Pobra.
O Auditorio do Museo Valle-Inclán foi a primeira parada da experiencia, onde unha das técnicas do Turismo do Concello lles explicou o cometido da actividade e procedeu a proxectar unha peza audiovisual que reflicte toda a cadea pola cal pasan os recursos marisqueiros, dende o proceso extractivo ata que chegan á mesa das e dos comensais en elaboradas receitas. Ademais, fíxolles entrega dun receitario de diferentes elaboracións que se fan nos establecementos hostaleiros do municipio.
Posteriormente, achegáronse ata Os Areos para comprobaren in situ o traballo das mariscadoras e os diferentes tipos de bivalvos que se atopan nas praias da localidade.
Estas visitas-experiencia continuarán nos vindeiros meses co obxectivo principal de achegarlles á rapazada o oficio das mariscadoras e fomenta-lo respecto polo mar, polo traballo neste eido e polo medio natural, ao tempo que se contribúe con esta acción á desestacionalización da demanda turística.
